Tom Biespell bie Mennonite Your way
Jefft daut daut noch? Plautdietsch Urlaub moake? Nutz wie onse weltwiede Kontakte emma noch, om onse Cousins, Nichte, Oomasch en Oopasch, oole Frind, Kollegen en eejemolje Nohbasch enne Ferien to besetje en mol doagelang rechtich to spaziere?
Jast ut Kanada
Etj, oppjewosse enne Kolonie Nielaunt, freid mie auls Tjind emma seeha, wan Frindschaft ut Kanada oda Dietschlaunt to Besuch kaum. Dee brochte eene gaunz aundre Welt met, obzwoa dee Mensche enn Kanada tom Biespell kratjt soo en mennische Darpa lewde auls wie. Oba dee haude Schnee.
Mejeenje Couch-Huckasch
Uck vondoag tjan etj noch vel Mensche von onsem Schlag, fe den bediet Urlaub, dee Bekaunde em ejnen Launt oda oppem aundren Kontinent to besetje. Auls spoasauma Mennonit ess daut uck ne bilje Oat, aundre Lenda utokundschafte. Hauns Peetasch (Nome je-endat) ut Abbotsford beschwead sich mol bie mie ewa sien Frindschaft ut Dietschlaunt, daut Kanada en ahm selfst besocht haud. „Met den we nuscht loos, dee saute den gaunzen Dach moa oppe Coach.“ Jletj jehaut, wudd etj saje, wiels wan dee Jast dan uck noch een aunspruchsvollet Reiseprogramm hawe, dan kaun dee Jastjewa met den noch derche Prärie noh New York foahre, woobie sich dee Gaust vleicht noch nich mol aum Benzin bedeelicht. Oba: daut besteiht je emma dee Meajlichtjeit, daut em neachsten Joah tridj to tole en dem leewen Schwoaga enn Dietschlaunt eenen Jeajenbesuch auftostaute. Om dan siene Aunsprüche to vemalde: Kölna Dom, Loreley, Berlin, Toskana.
Vondoag reise Menniste noh Cancún
Vondoag moake oba uck dee moderne Menniste klassischen Urlaub: See bode en Mallorca, drintje Beeja aum Ballermann, krupe oppe Alpe, vejneje sich en Cancún, scheete bie dee Safari en Kenia dee Elefaunte mette Fotokamera auf.
Grooßoatje Grootstaudt
Bie ons enn Paraguay moke dee Menniste enne 60-ja oda 70-ja Joahre tjeenen Urlaub. Auls Pioniere haud maun tjeene Tiet en tjeen Jeld fe soonen „Luxus“. Ons Pa haud een Jeschaft, hee must soowiesoo noh Asunción, om doa enntotjeepe. Aulso nauhm hee dee Familje met. Asunción, Grootstaudt! Stundelang kunn etj Autos tahle, em Chaco were dee noch selden. Dee Mensche oppe Gausse jinje schwinda en elegaunta auls wie em Darp, en jeajen Owend oppe Plaza kusste sich dee junge Poatjes, en aula kunne daut seehne. Aum Schoolaunfang froch dee Lehra, waut wie enne Ferien jedohne haude. Bejeistat vetahld etj von mien Grootstaudt-Erlebnis. Dee aundre haude uck vel erleft: Krut hacke, Boomwoll pletje, Ednet ernte. Nohea red etj nich meeha von Asunción. We mie peinlich.
Amische aum Straunt von Florida
Dee Amische hawe daut Urlaube uck fe sich entdatjt. Pinecraft ess een tjliena Otsdeel enn Florida, dee auls “Amish-Straunt” bekaunt ess. Vel Amisch-Familjes vebrinje hia den Winta, om sich vere Tjild bie ahn tus to dretje. Dee Gausse en Pinecraft send dan voll met Mensche, dee auls em 18. Joahhundat jetjleedt send. Aum Strand send se oba manchmol enn Bodaunziej en Bodbetjse to seehne.
Dee mennonitischa Wajch: Mennonite Your Way
Dee Internet-Plattform Mennonite Your Way ess woll dee typischste Oat, fe Menniste Urlaub to organisieren. Doahinja statjt daut Prinzip, daut etj enn miene Wohnung fe eene Spende urlaubende Mennonite oppnehm. Dan lot etj mie bie Mennonite Your Way registriere, en wan daut Dusende doohne, jefft daut aula weajen oppe Welt jenstje Urlaubsziele. Butadem leht maun aundre Menniste bzw. Tjriste tjane. Reisende tjene bie Mennonite oppe gaunze Welt ewanachte en opp disse Wies authentische Erfoahrunge moake. Daut jeiht doabie oba uck om tjristliche Wete, dee maun meteenaunda deelt, om Gaustfrindschaft, Leewe, Veasorj, Vetrue.
Ewanachte fe eene „faire“ Spende
Dee Plautform bitt veschiedne Unjakunftstype aun – separate Wohninje, Wohnmobile, Gaustzimma oda Schlope oppe Coach enne Spazieastow. Gaunz omsonst ess daut nich. Variante 1: Wea ut eenem utjedruckten Katalog (kaun maun online bestahle) utwehlt, bie dem ess daut soo: Dee Gaustjewa bett om eene faire Spende – sull oba verre Aunkonft ve-eenboat woare. Pro Mohltiet, wan dee Gaust ete well, woat een Opppries von 5 US-Dola empfohle. Variante 2: Oppe Online-Plautform stalt dee Gaustjewa eene List opp, fe waut hee Spende hawe well. Hee kaun uck toosetzliche Koste oppliste fe Reiseleita, Aufhole vom Flughowe, Nutze vom Whirlpool etc. Wan maun auls Gaust daut nutze well.
Daut ajchte Couchsurfing en daut Nohjemoakte
Ejentlich nant man disse Form von Ferien Couchsurfing, wiels daut Grundprinzip ess, daut man bie Framde oppe Couch ewanacht. Oba vondoag jefft daut uck vel komfortablere Aunjebotte. Etj dentj, Mennonite Your Way we dee Erfinja von Couchsurfing, seit 1976 besteiht dee Organisatioon. Daut jefft oba uck eene groote Firma, dee nant sich diretjt Couchsurfing. Een kommerziellet Gaustfrindschaufts-Natwoatj met 12 Millioone Metjlieda.
Een Herna retjent met weinja Gaust auls een Hamburga
Doa ess ons Mennonite Your Way sympathische. Send je uck „onse“ Mensche, dee daut aunbeede. Wan maun enn Herne wohnt, soo auls etj, kaun maun met weinich Jast retjne, wiels, wea well aul enn Herne Urlaub moake. New Yorker, Parisa oda Hamburga sulle sich daut eeha ewalaje, opp see Gaustjewa bie Mennonite Your Way woare welle. Sonst hawe see emma Jast.
Scheenen Urlaub wenscht Horst Moates von menno-welt.net